TFA Yaanza Kutoa Elimu kwa Wafugaji wa Kuku Kuhusu Matumizi Sahihi ya Dawa za Mifugo

Mkulimajembe.blogspot.com

Mkulimajembe.blogspot.com

Mkurugenzi Mtendaji wa Tanganyika Farmers Association (TFA), Bw. Jastin Shirima, amesema kuwa taasisi hiyo imeanza kutoa elimu kwa wafugaji wa kuku katika maeneo mbalimbali kwa lengo la kuhamasisha matumizi sahihi ya dawa za mifugo na kukabiliana na tatizo la usugu wa dawa.

Bw. Shirima alisema kuwa usugu wa dawa ni changamoto kubwa inayoongezeka duniani na inaweza kuathiri afya ya binadamu, wanyama pamoja na mazingira endapo hatua stahiki hazitachukuliwa. Alieleza kuwa matumizi yasiyo sahihi ya dawa za mifugo, ikiwemo matumizi ya dawa bila ushauri wa wataalamu, kutokufuata dozi zinazopendekezwa na matumizi ya mara kwa mara ya dawa zilezile, huchangia kuibuka kwa vimelea vinavyoshindwa kutibika kwa dawa zilizopo.

Kupitia programu hiyo ya elimu, TFA inawajengea uwezo wafugaji wa kuku kuelewa umuhimu wa kufuata maelekezo ya wataalamu wa mifugo, kuzingatia vipindi vya matumizi ya dawa na kutunza kumbukumbu sahihi za matibabu ya mifugo yao. Mafunzo hayo pia yanahusisha mbinu bora za ufugaji zinazosaidia kuzuia magonjwa kabla hayajatokea badala ya kutegemea matumizi ya dawa pekee.

Aidha, Bw. Shirima alisisitiza kuwa kulinda afya ya wanyama ni sehemu muhimu ya kulinda afya ya binadamu, kwa kuwa bidhaa za mifugo zinazotumiwa na wananchi zinatokana na wanyama hao. Aliongeza kuwa matumizi sahihi ya dawa yanasaidia kuhakikisha usalama wa chakula, kuongeza uzalishaji na kulinda mazingira dhidi ya athari zinazoweza kusababishwa na mabaki ya dawa.

TFA inaamini kuwa kupitia elimu hii, wafugaji wataongeza uelewa kuhusu hatari za usugu wa dawa na kuchukua hatua stahiki za kuzuia tatizo hilo. Hatua hiyo ni sehemu ya juhudi za kuimarisha sekta ya ufugaji nchini, kuongeza tija kwa wafugaji na kuchangia katika kulinda afya ya jamii kwa ujumla.

Mradi huu unaendelea kutekelezwa katika maeneo mbalimbali kwa ushirikiano na wadau wa sekta ya mifugo, huku ukilenga kuhakikisha wafugaji wengi zaidi wanapata elimu na ujuzi unaohitajika katika matumizi salama na sahihi ya dawa za mifugo.

WAFUGAJI WA KUKU WAMPONGEZA TFA KWA MAFUNZO YA KUPAMBANA NA USUGU WA DAWA

 

Wafugaji wa kuku wameipongeza TFA kwa kuendelea kutoa mafunzo yenye lengo la kuimarisha afya ya binadamu, wanyama na mazingira kupitia kampeni ya kupambana na usugu wa dawa za antimicrobials.

Wakizungumza mara baada ya kushiriki mafunzo hayo, wafugaji hao walisema elimu waliyoipata imewasaidia kuelewa matumizi sahihi ya dawa kwa mifugo na madhara yanayoweza kujitokeza kutokana na matumizi holela ya dawa hizo.

Walisema usugu wa dawa ni tatizo linaloongezeka duniani na linaweza kuhatarisha afya ya watu pamoja na uzalishaji wa mifugo endapo hatua za kudhibiti matumizi yasiyo sahihi ya dawa hazitachukuliwa mapema.

“Tunawashukuru TFA kwa kutupatia elimu hii muhimu. Sasa tumeelewa umuhimu wa kutumia dawa kwa ushauri wa wataalamu, kufuata dozi sahihi na kuzingatia muda wa kusubiri kabla ya kutumia mazao yanayotokana na mifugo iliyotibiwa,” alisema mmoja wa wafugaji walioshiriki mafunzo hayo.

Kwa upande wake, mwakilishi wa TFA alisema mafunzo hayo ni sehemu ya juhudi za kuhamasisha jamii kuhusu dhana ya Afya Moja (One Health), inayotambua uhusiano uliopo kati ya afya ya binadamu, afya ya wanyama na mazingira.

Alieleza kuwa matumizi sahihi ya dawa kwa mifugo yana mchango mkubwa katika kupunguza hatari ya kuibuka kwa vimelea vinavyosugu dawa, hali inayoweza kuathiri matibabu kwa binadamu na wanyama.

Washiriki wa mafunzo hayo walihimizwa kuendelea kuwa mabalozi wa elimu hiyo katika maeneo yao ili kuhakikisha wafugaji wengi zaidi wanapata uelewa kuhusu namna bora ya kupambana na usugu wa dawa na kulinda afya ya jamii kwa ujumla.

Mafunzo hayo yamepokelewa kwa furaha na wafugaji ambao wameahidi kuyafanyia kazi mafunzo waliyopewa kwa lengo la kuboresha ufugaji, kuongeza uzalishaji na kuchangia katika kulinda afya ya binadamu, wanyama na mazingira.